သိန်း တစ်သောင်းတန်မြေကွက် ၆ ကွက်ကို ရောင်းပြီးအလှူလုပ် သီလရှင်အပြီးဝတ်တော့မည့် ကမ္ဘာပတ်ဒေါ်တင်တင်စိန်

သိန်း တစ်သောင်းတန်မြေကွက် ၆ ကွက်ကို ရောင်းပြီးအလှူလုပ် သီလရှင်အပြီးဝတ်တော့မည့် ကမ္ဘာပတ်ဒေါ်တင်တင်စိန်

၁၉၅၅ ခုနှစ်မှစတင်ကာ နိုင်ငံပေါင်း ၂၉ နိုင်ငံကို ခင်ပွန်းသည်နှင့်အတူ ဒုတိယကမ္ဘာစစ်လက်ကျန် မော်တော် ဆိုင်ကယ်အဟောင်းနှင့် ကမ္ဘာပတ်ခဲ့သူ ဒေါ်တင်တင်စိန်သည် သိန်းပေါင်း ၆ သောင်းတန်ဖိုးရှိသည့် သူပိုင်ဆိုင်သော မြပုဂံဟိုတယ်နှင့် မြေကွက် ၆ ကွက်ကိုရောင်းချပြီးပါက လှူဒါန်းမှုများပြုလုပ်၍ သီလရှင်ဝတ်တော့မည်ဖြစ်ကြောင်း သိရသည်။

မြပုဂံဟိုတယ်သည် ပုဂံမြို့လောကနန္ဒာဘုရားအနီးတွင်တည် ရှိပြီး ဘန်ဂလို ၁၁ လုံးဖြင့် ဖွဲ့စည်းထားသော ဟိုတယ် ဖြစ်သည်။ အကျယ်အဝန်းအားလုံးသည် ၂ ဧကခန့်ရှိပြီး ပေ ၆ဝ ထ ၈ဝ ခြောက်ကွက်ရှိကြောင်း သိရသည်။ ကာလ ပေါက်ဈေးအရ ယင်းမြေကွက်များသည် တကွက်လျှင် သိန်းတသောင်းခန့်ရှိသည်။

”အမှန်က မြေကွက်ကြီးပဲဆိုရင် ၆ ကွက်ပါတယ်။ ဈေးကတော့ ဖွင့်မထားဘူး။ ပေးတဲ့သူပေါ်မှာမူတည်ပြီး ဆုံးဖြတ်ဖို့ ကျွန်မစိတ်ကူးထားပါတယ်။ ပုဂံက ဟိုတယ်တွေက အလုပ်ဖြစ်ကြပါတယ်။ ရောင်းတာတို့၊ ဝယ်တာတို့ အဲဒီလိုလုပ် ကြတယ်။ အဲဒါကြောင့်မို့လို့ ကျွန်မက ဈေးမဖွင့်ဘဲနဲ့ ထားထားတာပါ” ဟု ဒေါ်တင်တင်စိန်က ပြောသည်။ ဒေါ်တင်တင်စိန်သည် ယခုအခါအသက် ၈၄ နှစ်ရှိပြီဖြစ်ပြီး သက်သတ်လွတ် စားခဲ့သည်မှာ နှစ်ပေါင်း ၅ဝ ရှိကာ နေ့တိုင်းဥပုသ်စောင့်ခဲ့သည်မှာလည်း တနှစ်ရှိပြီဖြစ်ကြောင်း သိရသည်။

”တကွက်ကို သိန်းတစ်သောင်းပေါက်တယ်။ ခြောက်ကွက်ဆိုတော့ ခြောက်သောင်း။ လက်ရှိအဆောက်အဦတွေ ကလည်း သိန်းတသောင်းကျော်တန်ပါတယ်။ ခြံကြီးက အကျယ်ကြီးပေါ့။ လောကနန္ဒာဘုရားနဲ့ နီးတယ်ဆိုပေမဲ့ ရှေးဟောင်းဘုရား တွေ နဲ့ လွတ်ပါတယ်။ ဈေးနဲ့လည်း နီးပါတယ်။ ရောင်းရင်တော့ အကုန်လုံးတပြိုင်တည်း ရောင်းမှာပါ။ ဖဲ့တော့ မရောင်း ပါဘူး”ဟု ဆိုသည်။

ဒေါ်တင်တင်စိန်သည် ခင်ပွန်းသည်နှင့်အတူ အိန္ဒိယ၊ ပါကစ္စတန်၊ အီရတ်၊ ဂျော်ဒန်၊ ကူဝိတ်၊ ဆီးရီးယား၊ လက်ဘနွန်၊ တူရကီ၊ သြစတြီး ယား၊ ဂရိ၊ အယ်ဘေးနီးယား၊ ယူဂိုစလားဗီးယား၊ ဆွစ်ဇာလန်၊ အီတလီ၊ ဂျာမနီ၊ ဒိန်းမတ်၊ နော်ဝေ၊ ဆွီဒင်၊ ပြင်သစ်၊ ဗြိတိန်၊ ရူမေးနီးယား၊ ချက်ကိုစလိုဗက်ကီးယား၊ စပိန်၊ ပေါ်တူဂီ၊ ဂျီဗလာတာ၊ ဟော်လန်၊ လူဇင်ဘတ်၊ ပိုလန်၊ ဘယ်ဂျီယံ စသည့်နိုင်ငံများသို့ ရောက်ရှိခဲ့ပြီး နိုင်ငံ အသီးသီးမှခေါင်းဆောင်များ၊ ဘုရင်များ၊ ဝန်ကြီးချုပ်များ၊ ဘုရင်ခံများ နှင့်တွေ့ဆုံခွင့်ရခဲ့သည်။

ထို့အပြင် ဗြိတိန်၊ အင်္ဂလန်သို့ရောက်ရှိစဉ်တွင် တီဗီအင်တာဗျူးအစီအစဉ်အတွက် မေးမြန်းခြင်းခံခဲ့ရသည်။ ထိုခရီး စဉ်များနှင့်ပတ်သက်၍စာအုပ်များလည်း ထွက်ရှိခဲ့ပြီးဖြစ်သည်။ ခရီးမိုင် ပေါင်း ၅ သောင်း ၈ ထောင်ခန့်ကို တနှစ်အတွင်း လှည့်လည် သွားရောက် ခဲ့ခြင်းဖြစ်သည်။ သို့သော်ထိုခရီးစဉ်အားလုံးကို ဆိုင်ကယ်နှင့်အပြီး သွားခဲ့ခြင်းမဟုတ်ဘဲ အင်္ဂလန်မှအပြန် ခရီးတွင်ရထား၊ ကား၊ သင်္ဘောတို့နှင့် အဆင့်ဆင့်ပြောင်းစီးခဲ့ပြီး နောက်ဆုံးတွင် ကာလကတ္တားမှတဆင့် ရန် ကုန်မြို့သို့ လေယာဉ်ဖြင့် ပြန်လည်ရောက်ရှိခဲ့ခြင်းဖြစ်သည်။

”ဟုတ်ပါတယ်။ လှူမှာပါ။ လှူပြီးတော့ သီလရှင်ဝတ်တော့မှာပါ။ ၈၄ နှစ်ရှိပြီလေ”ဟု ဒေါ်တင်တင်စိန်က သူ့စိတ်ကူးကို ပြောသည်။

ဒေါ်တင်တင်စိန်အဘိုးသည် အင်္ဂလိပ်လူမျိုးရဲမင်းကြီးသားဖြစ်ကာ အဘွားသည် မွန်အမျိုးသမီးမော်လမြိုင်သူ ဒေါ်ငွေညွန့် ဖြစ်သည်။ အဘိုး၏သွေးကြောင့် သူ့ပုံစံသည် နှာတံစင်းစင်း၊ အရပ်မြင့်မြင့် ရွှေရောင်သန်းဆံပင်နှင့် ဖြစ်သော်လည်း ဗီဇသည်အဘွားဘက်သို့ များခဲ့သည်။ ဝိပဿနာတရားများကို တကိုယ်တည်းကျင့်ကြံအား ထုတ်ရုံမျှမက နောက်ပိုင်းတွင် ခရီးသွားလေရာ၌ ဝိပဿနာတရားများကို ဟောပြောပြသခြင်း၊ တရားစခန်းများ ဖွင့်လှစ်ခြင်းတို့ကိုလည်းပြုလုပ်ခဲ့ကြောင်း သိရသည်။

Credit – News Watch

Leave a Reply

Your email address will not be published. Required fields are marked *